Habakkuk 2

1 ^aNĩngũrũgama handũ hakwa ha kũrangĩra,
na njikare o hau rũthingo igũrũ.
Njetereire njigue ũrĩa ekũnjĩĩra,
nĩguo menye ũrĩa ingĩcookia nĩ ũndũ wa iteta rĩĩrĩ.

Icookia rĩa Jehova

2 ^bNake Jehova akĩnjookeria atĩrĩ,

“Andĩka ũguũrio ũyũ,
ũwandĩke wega ihengere-inĩ na ndemwa nene,
nĩgeetha ũthomeke wega,
o na mũndũ angĩkorwo atengʼerete.
3 ^cNĩgũkorwo ũguũrio ũyũ wetereire ihinda rĩrĩa rĩtuĩtwo;
waragia ũhoro wa matukũ ma mũthia,
na ndũngĩtuĩka wa maheeni.
O na ũngĩikara mũno-rĩ, weterere.
Ti-itherũ nĩũkahingio, na ndũgatĩĩrio.

4 ^d“Atĩrĩrĩ, mũndũ mwĩtĩĩi-rĩ,
merirĩria maake ti marũngĩrĩru;
no mũndũ ũrĩa mũthingu
agatũũra muoyo nĩ ũndũ wa gwĩtĩkia gwake;
5 ^eti-itherũ, mũndũ ũcio mwĩtĩĩi nĩakunyanagĩrwo nĩ ndibei;
nĩ mwĩtĩĩi na ndarĩ hĩndĩ ahurũkaga.
Tondũ akorokete ta mbĩrĩra,
na o ta ũrĩa gĩkuũ gĩtaiganagia,
o nake ndaiganagia;
acookanagĩrĩria ndũrĩrĩ ciothe harĩ we,
na agataha andũ a ndũrĩrĩ ciothe.
6“Githĩ andũ othe matikamũthekerera makĩmũnyũrũragia, na mamũnyarare, makiugaga atĩrĩ,

“ ‘Kaĩ mũndũ ũrĩa wĩigagĩra indo cia ũici,
na agetongia na indo cia ũtunyani arĩ na haaro-ĩ!
Egũtũũra ekaga ũguo nginya-rĩ?’
7 ^fAndũ arĩa ũrĩ na thiirĩ wao githĩ matigagũũkĩrĩra o rĩmwe?
Githĩ matikaarahũka, na matũme ũinaine,
macooke makũnyamarie?
8 ^gTondũ nĩũtahĩte ndũrĩrĩ nyingĩ indo ciao,
matigari ma ndũrĩrĩ icio, nĩmagagũtaha indo o nawe.
Nĩ ũndũ nĩũitĩte thakame ya andũ,
na ũkaananga mabũrũri, na matũũra manene, o na arĩa othe marĩ kuo.

9 ^h“Mũndũ ũrĩa wakaga wathani wake,
na agetongia na uumithio ũtarĩ wa kĩhooto,
nĩgeetha aake nyũmba yake handũ igũrũ
nĩguo ehonokie ndakanyiitwo nĩ mwanangĩko,
kaĩ arĩ na haaro-ĩ!
10 ⁱWee wanaciirĩra kũniinwo kwa ndũrĩrĩ nyingĩ,
ũgaconorithia nyũmba yaku mwene,
na ũkoorwo nĩ muoyo waku.
11 ^jMahiga ma rũthingo nĩmakanĩrĩra,
na mĩgamba ya mbaũ nĩĩkamũkĩria.

12 ^k“Mũndũ ũrĩa wakithagia itũũra inene na ũiti wa thakame,
na akahaanda itũũra na njĩra cia ũmaramari, kaĩ arĩ na haaro-ĩ!
13Githĩ Jehova Mwene-Hinya-Wothe ndatuĩte
atĩ wĩra wa andũ no ngũ cia gwakĩrĩria mwaki,
na atĩ ndũrĩrĩ ciĩnogagia o tũhũ?
14 ^lNĩgũkorwo thĩ nĩĩkaiyũrwo nĩ ũmenyo wa riiri wa Jehova,
o ta ũrĩa maaĩ maiyũrĩte iria-inĩ.

15“Mũndũ ũrĩa ũheaga andũ a itũũra rĩake njoohi,
akamatahĩria mondo-inĩ ya rũũa ya ndibei nginya makarĩĩo,
nĩgeetha erorere njaga yao, kaĩ arĩ na haaro-ĩ!
16 ^mŨkaiyũrwo nĩ thoni, handũ ha kũgĩa na riiri.
Rĩĩrĩ nĩrĩo ihinda rĩaku!
Nyua, ũrĩĩo,
nayo njaga yaku yoneke!
Gĩkombe kuuma guoko-inĩ kwa ũrĩo kwa Jehova
nĩkĩragũkora, na njono nĩikũhumbĩra riiri waku.
17 ⁿHaaro ĩrĩa ũrutĩire Lebanoni-rĩ, nĩĩgakũhubĩkania,
na wanangi waku wa nyamũ-rĩ, nĩũgakũmakia mũno.
Nĩ ũndũ nĩũitĩte thakame ya andũ,
na ũkaananga mabũrũri, na matũũra manene, na arĩa othe marĩ kuo.

18 ^o“Mũhianano mũicũhie nĩ wa bata ũrĩkũ mũndũ aarĩkia kũwacũhia?
O naguo mũhianano wa gũtwekio ũrĩa ũtũmaga andũ maheeneke nĩ wa bata ũrĩkũ?
Nĩgũkorwo ũrĩa ũũthondekaga ehokaga kĩrĩa ombĩte;
athondekaga mĩhianano ĩtaaragia.
19 ^pMũndũ ũrĩa wĩraga rũbaũ atĩrĩ, ‘Gĩa na muoyo!’
Kana akeera ihiga rĩtarĩ muoyo atĩrĩ, ‘Arahũka!’ Kaĩ arĩ na haaro-ĩ!
Indo ta icio ciakĩhota kuonia mũndũ njĩra?
Ihumbĩtwo thahabu na betha;
no itirĩ na mĩhũmũ thĩinĩ wacio.
20No rĩrĩ, Jehova arĩ hekarũ-inĩ yake theru;
thĩ yothe nĩĩkire ki ĩrĩ mbere yake.”